Trajneri i Tottenham, Jose Mourinho, është shpallur trajneri i muajit nëntor në Premier League.
Ndërkohë, mesfushori i Manchester United, Bruno Fernandes, fiton çmimin e lojtarit më të mirë të muajit që kaloi.
“Special One” e siguroi këtë çmim për shkak se po kryeson kampionatin anglez. Rekordi i “Spurs” në nëntor ishte mbresëlënës, pasi fituan tri nga katër ndeshjet e tyre; veçanërisht kundër Manchester City. Ata e përfunduan muajin nëntor me një barazim ndaj Chelsea.
Mourinho shkroi në Instagram për të konfirmuar se e kishte mposhtur konkurrencën e Lampard (Chelsea), David Moyes (West Ham) dhe Ole Gunnar Solskjaer (Manchester United). “Çmimi i trajnerit të muajit, por për mua është ekipi i muajit, ose stafi i muajit, sepse ka të bëjë me lojtarët dhe të gjithë këta djem që janë këtu me mua: trajnerët, ndihmësit, djemtë e shkencës sportive, analistë dhe të tjerë, që nuk janë këtu, por punojnë kaq shumë, – shkroi portugezi. – Faleminderit për këtë, por nuk është trajneri i muajit, është ekipi dhe stafi i muajit”.
Sa i përket çmimit lojtari i muajit për nëntorin, mesfushori i Manchester United, Fernandes, e meritoi vlerësimin pasi shënoi 4 gola në kampionat, në 4 ndeshje. Mesfushori portugez tani ka tre çmime të tilla që nga transferimi i tij te “Djajtë e Kuq” në janar, një më pak se rekordi i mbajtur nga Cristiano Ronaldo gjatë kohës së tij në “Old Trafford”.
