Këshilli i Lartë Gjyqësor pranoi kërkesën e Inspektorit të Lartë të Drejtësisë për masën disiplinore shkarkim nga detyra për gjyqtarin e Korçë Markelian Kuqo.
Në përfundimet mbi hetimin e kryer, Inspektori i Lartë Artur Metani argumentoi se “veprimet e mosveprimet e ndërmarra nga gjyqtari në vendimin për lirimin nga burgu të Gert Gjinararit, ka cenuar besimin, që magjistrati duhet të përcjellë tek publiku në përmbushjen e misionit dhe rolit të tij në dhënien e drejtësisë, ka diskretituar rëndë figurën dhe pozitën e gjyqtarit dhe ka ulur dinjitetin e organit që përfaqëson, duke e bërë atë të pa denjë për vazhdimin e ushtrimit të funksionit të magjistratit”.
Inspektori i Lartë i Drejtësisë ka nisur hetimin disiplinor ndaj gjyqtarit më 2 prill 2020, bazuar në një kërkesë të depozituar nga ministri i Drejtësisë, pasi gjyqtari më 14.02.2019 urdhëroi lirimin e të dënuarit me burgim të përjetshëm Gerd Gjenerari (Gjenerali), i gjetur fajtor për vrasjen e Naim Zyberit në Itali, në vitin 1997. Vendimi për lirimin u rrëzua nga Gjykata e Apelit Korcë gjashtë muaj më vonë.
