Policia e Shtetit, në ditën e dytë të protestave qytetare, me moton “kërkojmë drejtësi për Klodianin”, i cili u vra nga një efektiv policie, duket se u shfaq më e organizuar se një ditë më parë në reagimin e saj.
Policë me skafandra, mburoja, shkopinj gome, gaz lotsjellës, sprite paralizues, apo ujë me presion u turrën rrugëve të Tiranës në ndjekje të protestuesve.
Në ndihmë të skemës së re për kapjen e protestuesve ka ardhur edhe teknologjia. Përmes grupeve “whats app” policët udhëzoheshin se kë duhet të kapnin, kë duhet të identifikonin, kush duhej të futej në aksion.
Gjithçka koordinohej nga “shefi” i cili zgjidhte personin që duhej ndaluar. Pas urdhërit që vinte në grupin e policëve, caktoheshin detyrat, kërkoheshin përforcime, apo identifikoheshin ata më të rrezikshmit.
Skema e re, thuhet se i ka ndihmuar shumë policët, veçanërisht ata që shërbejnë në Komisariatin nr 2, të cilët duket se me sukses të madh arritën të ndalonin edhe një prej gazetarëve që raportonte direkt protestën nga zona e 21 Dhjetorit.
Gjatë ditës së nesërme, në orët e paradites, policët pritet të analizojnë dhe perfeksionojnë skemën që aplikuan sot, duke marrë udhëzime nga shefi në grupin “whats app”.
Nuk dihet nëse do të ketë masa disiplinore ndaj efektivëve që nuk ishin aktivë në grupin e hapur posaçërisht, megjithëse pritet që një pjesë e tyre të justifikohen me padijen që kanë për të përdorur teknologjinë e re.
