Juventusi luan sot në orën 21:00 kundër Barcelonës në transfertë, në ndeshjen e fundit të fazës së grupeve në Ligën e Kampioneve.
Ekipi Italian është akomoduar në një hotel të qytetit spanjoll ku me të mbërritur aty Cristiano Ronaldo është përshëndetur nga qindra tifozë. Megjithëse masat për mbrojtje nga COVID-19 në Barcelonë janë mjaft të forta, qindra përkrahës ishin mbledhur për ta mirëpritur portugezin në Katalonjë.
Tifozët e mbledhur brohoritën thirrjen e famshme të Ronaldos: “Siuuuuuuuu”, e cila ndodh në stadiume gjithmonë kur shënon CR7-ta.
Duke qenë se të dy skuadrat janë kualifikuar tashmë në rundin e 16 më të mirëve, e gjithë vëmendja është në duelin Ronaldo vs Messi.
Kjo është hera e parë që Messi dhe Ronaldo do të takohen që prej vitit 2018, kur portugezi iu bashkua Juves nga Real Madridi.
