Nga BoldNews.al
Një seri dokumentash zyrtarë, të siguruar në bazë të ligjit për informim, tregojnë se institucionet e drejtësisë po favorizojnë në mënyrë të pakuptimtë ish-prokurorin e Krimeve të Rënda, Henrik Ligori, i dorëhequr në vitin 2018 dhe që aktualisht është avokat dhe pedagog i brendshëm i Shkollës së Magjistraturës.
“Boldnews.al” krahasoi përgjigjet e marra nga Prokuroria e Përgjithshme, Këshilli i Lartë i Prokurorisë dhe Komisioni i Pavarur i Kualifikimit, në të cilat dallohen diferenca të mëdha në informacionet e përcjella.
Për më tepër, mungesa e koherencës mes qëndrimeve institucionale, krijojnë dyshimet se strukturat e drejtësisë po kryejnë manovra për t’i ruajtur juristit Ligori statusin e magjistratit, të cilin, si rregull duhet ta kishte humbur për 15 vjet, pas dorëheqjes si prokuror ndërkohë që kishte hyrë në fuqi dhe kishte nisur zbatimi i ligjit të Vetingut.
Gjithçka nisi nga një njoftim i Komisionit të Pavarur të Kualifikimit (KPK), të publikuar në 16 Qershor 2020. Në atë njoftim, shkalla e parë e Vetingut publikoi listën e magjistratëve të shortuar për përfshirjen në procesin e rivlerësimit.
Në listë, me numër rendor 89, është vendosur emri i juristit Henrik Ligori, me statusin “prokuror i Krimeve të Rënda”.
Nga të dhënat e siguruara më herët nga “Boldnews.al” rezultonte se juristi Ligori, në kohën e publikimit të shortit, në Qershor 2020, ishte larguar nga pozicioni i Prokurorit.
Sipas të dhënave publike, Henrik Ligori, prej Shtatorit 2018 ishte regjistruar në Qendrën Kombëtare të Biznesit (QKB) si Avokat, ndërkohë që është i emëruar edhe si pjesë e stafit permanent pedagogjik të Shkollës së Magjistraturës.
Përballë këtyre të dhënave, “Boldnews.al” kërkoi informacion pranë institucioneve të ndryshme, për të kuptuar saktësisht statusin e z. Ligori.
Kërkimi zbuloi të dhëna, të cilat vënë në pikëpyetje seriozitetin e institucioneve të reja të dretësisë.
Dorëheqja
Në 3 Korrik 2018, Henrik Ligori i drejton Prokurores së Përgjithshme (të Përkohshme) të asaj kohe, Arta Marku, kërkesën për dorëheqje nga detyra dhe, rrjedhimisht edhe nga statusi i magjistratit.
Në shkresën e siguruar nga Prokuroria e Përgjithshme, rezulton se Ligori e ka argumentuar dorëheqjen me faktin se ai është emëruar si pedagog i brendshëm i Shkollës së Magjistraturës.
Vetëm një ditë më pas, në 4 Korrik 2018, Arta Marku pranon kërkesën për dorëheqjen e Henrik Ligorit. Po në të njëjtën ditë, Prokuroria e Përgjithshme njofton zyrtarisht Komisionin e Pavarur të Kualifikimit për “mbarimin e mandatit të prokurorit” të z. Henrik Ligori.
Komisioni i Pavarur i Kualifikimit, i cili kishte administruar formularët e pasurisë, integritetit dhe profesionalizmit të subjekteve, përfshirë edhe ato të prokurorit, që në fund të vitit 2017, duhet të kishte ndjekur procedurën formale, atë të ndërprerjes së Vetingut për tashmë ish-prokurorin Ligori, si edhe ndalimin e aktivizimit të tij në sistemin e drejtësisë për 15 vjet, siç është parashikimi ligjor dhe një vendim i Gjykatës Kushtetuese.
Por, gjërat nuk ndoqën këtë logjikë juridike dhe praktike.
Këshilli i Lartë i Prokurorisë
“Boldnews.al” kërkoi nga Këshilli i Lartë i Prokurorisë (KLP) informacion mbi statusin e juristit Henrik Ligori, nisur nga fakti që Komisioni i Pavarur i Kualifikimit e ka përfshirë në shortin e Vetingut, në Qershor 2020.
Në përgjigje, Këshilli i Lartë i Prokurorisë deklaroi për redaksinë se “Pas verifikimit të kryer në Sektorin e Burimeve Njerëzore pranë Këshillit të Lartë të Prokurorisë, nuk rezultojnë të dhëna personale të ish-magjistratit z. Henrik Ligori, pasi është larguar nga detyra para Vendimit nr.1, datë 19.12.2018, “Për Krijimin e Këshillit të Lartë të Prokurorisë”.
Megjithatë, Këshilli i Lartë i Prokurorisë, prej disa javësh, nuk i është përgjigjur kërkesës se përse emri i Henrik Ligorit gjendet në listën e shortuar nga Komisioni i Pavarur i Kualifikimit në Qershor 2020, ku gjendet shënimi: “Lista e subjekteve të rivlerësimit në këtë short u gjenerua nga listat e ardhura nga … Këshilli i Lartë i Prokurorisë me shkresën nr. 833/1 prot., datë 1.11.2019.”
Duke krahasuar përgjigjen e Këshillit të Lartë të Prokurorisë (KLP)për “Boldnews.al” dhe informacionin e publikuar zyrtarisht nga Komisioni i Pavarur i Kualifikimit, rezulton një diferencë shumë e madhe.
KLP deklaron për redaksinë se emri i Henrik Ligorit nuk rezultonte në regjistrat e tij, në momentin e krijimit të institucionit, në Dhjetor 2018.
Por, një vit më vonë, në Nëntor 2019, Këshilli i Lartë i Prokurorisë i ka dërguar Komisionit të Pavarur të Kualifikimit (KPK) listën e përditësuar të subjekteve deklarues, ku përfshihet edhe emri i Henrik Ligorit, me statusin e “Prokuror pranë Krimeve të Rënda”.
Komisioni i Vetingut
“Boldnews.al” kërkoi nga Komisioni i Pavarur i Kualifikimit se përse emri i i Henrik Ligorit ishte përfshirë në shortin e Vetingut të Qershorit 2020, ndërkohë që ky institucion ishte njoftuar dy vjet më parë se ai kishte dhënë dorëheqjen nga statusi i magjistratit.
Komisioni i Pavarur i Kualifikimit jep një tjetër version. Sipas shkresës së nënshkruar nga titullarja e këtij institucioni, Pamela Qirko, juristi Henrik Ligori është përfshirë në Veting si “ish-prokuror”, sipas përcaktimeve të nenit 179/b, pika 4, fjalia e dytë e Kushtetutës së Republikës së Shqipërisë.
Pra, për Komisionin e Pavarur të Kualifikimit, Henrik Ligori është përfshirë në kontrollin e tre-fishtë, me kërkesë të tij, “pasi, ky subjekt, në kohën kur hyri në fuqi ligji 84/2016, nuk e gjeti atë në detyrë si prokuror e për rrjedhojë kërkoi që të përfshihej në Veting (si ish-prokuror)”.
Por, qëndrimi i Komisionit të Pavarur të Kualifikimit nuk përkon me faktet zyrtare.
Ish-prokurori Henrik Ligori ka dhënë dorëheqjen në Korrik 2018, e konfirmuar kjo nga Prokuroria e Përgjithshme.
Në atë kohë, ligji për Vetingun (84/2016) jo vetëm kishte hyrë në fuqi, por trupa e shkallës së parë të Vetingut kishte nisur të merrte vendimet e para për shkarkimin apo konfirmimin në detyrë të zyrtarëve të ndryshëm.
Gjithashtu, disa muaj para se Henrik Ligori të jepte dorëheqjen, Komisioni i Pavarur i Kualifikimit kishte marrë vendime për ndërprerjen e Vetingut dhe pengimin për të qenë pjesë e sistemit të drejtësisë për 15 vjet për zyrtarë të ndryshëm të strukturave të drejtësisë, të cilët dhanë dorëheqjen para se të përballeshin me gjetjet e vetingut.
Madje, para dorëheqjes së ish-prokurorit Henrik Ligori, të dy strukturat e Vetingut, Komisioni i Pavarur i Kualifikimit dhe Kolegji i Posaçëm i Apelimit kishte konsoliduar praktikën për rastet e dorëheqjeve.
Me vendimin nr.1, datë 11 qershor 2018, Kolegji i Posaçëm i Apelimit mori vendimin për ish-prokurorin e Përgjithshëm, Adriatik Llalla, i cili shënoi edhe precedentin për rastet e mëvonshme, kur të dorëhequrve u ndalohej rikthimi në sistemin e drejtësisë për 15 vjet.
Ky vendim i shkallës së dytë të Vetingut rezulton të jetë marrë rreth 1 muaj para se Henrik Ligori të jepte dorëheqjen nga pozicioni i prokurorit.
Pra, rrjedhimisht, Komisioni i Pavarur i Kualifikimit, me marrjen e njoftimit për mbarimin e statusit të magjistratit të Ligorit, për shkak të dorëheqjes, duhet të kishte marrë vendim për ndërprerjen e procesit të Vetingut ndaj tij dhe ndalimin për të qenë pjesë e sistemit të drejtësisë për 15 vjet.
Por, siç rezulton, Komisioni i Pavarur i Kualifikimit as nuk e ka ndërprerë procesin e Vetingut dhe as nuk ka urdhëruar ndalimin e tij për rikthim në drejtësi për 15 vjet.
Përkundrazi, pa kryer këto funksione, tashmë Komisioni i Pavarur i Kualifikimit e konsideron Henrik Ligorin si një “ish-prokuror”, i cili ka shprehur dëshirën për t’u përfshirë në Veting, ndërkohë që e ka shortuar me statusin e “Prokurorit të Krimeve të Rënda”, funksion që e ka mbajtur deri në Korrik 2018.
