Ndërsa Rusia filloi administrimin e vaksinës së saj Sputnik V në 70 qendra në Mosk fundjavën e kaluar dhe Mbretëria e Madhe nisi përpjekjen e saj mbarëkombëtare të vaksinimit Covid-19 të martën, Franca vetëm tani ka filluar të zbulojë planin e saj.
Vaksinat do të administrohen në tre faza duke filluar nga 4 janari 2021 me target grupet më të prekura.
Në përputhje me rekomandimet e Autoritetit Kombëtar Francez për Shëndetin, rreth 1 milion vaksina do të administrohen në janar për të moshuarit në azile dhe për stafin shëndetësor.
Fushata më pas do të shtrihet në shkurt për rreth 14 milionë qytetarë të moshuar dhe njerëz me sëmundje bashkëshoqëruese.
Faza e tretë dhe e fundit e fushatës do të fillojë në pranverën e vitit 2021, kësaj here duke u shtrirë në pjesën tjetër të popullsisë.Vaksinat do të administrohen falas dhe nuk do të jenë të detyrueshme.
“Dhënia përparësi e të moshuarve, është një strategji e mirë”, tha profesori Antoine Flahault, një epidemiolog dhe drejtor i Institutit për Shëndetin Global në Fakultetin e Mjekësisë të Universitetit të Gjenevës. “Sidoqoftë, ka disa kundërshtime ndaj strategjisë brenda komunitetit shkencor.”
Të moshuarit kanë një sistem imunitar më të dobët, kështu që vaksina mund të jetë më pak efektive me ta. Gjithashtu, ata janë më të prirur të kenë efekte anësore për shkak të sëmundjeve që kanë. Madje, nëse do t’u shfaqet një tjetër komplikacion shëndetësor serioz, faji do t’i mbetet vaksinës dhe besueshmëria e saj do të vihet në dyshim.
Megjithatë për shkencëtarët është më e pranueshme vaksinimi sesa të lihen të moshuarit të paimunizuar. Ata nuk e dinë se sa do të zgjasë efekti i vaksinës dhe askush nuk e di akoma nëse do të ndalojë përhapjen e virusit. /France24
