Thomas Strakosha u kthye titullar me Lazion në ndeshjen e fundjavës ndaj Udinese, por paraqitja e gardianit të kombëtares sonë nuk ishte më e mira e mundshme sipas medieve italiane.
Strakosha pësoi gola të evitueshëm dhe mësohet se paraqitja e tij ka vënë në dilemë të madhe trajnerin Inzaghi.
Reina, portieri i dytë ka bërë shumë mirë, duke ofruar garanci të madhe mes katërkëndëshit dhe aktivizimi i tij si titullar nuk do të ishte aspak gabim.
Trajneri i Lazios është në një dilemë të madh sepse nëse Strakosha do ulej në stol do të pësonte një goditje të madhe. Inzaghi vazhdimisht e ka theksuar se Thomas është portieri i parë i skuadrës dhe mbetet të shihet nëse vazhdon të ketë të njëjtin mendim në ndeshjen e radhës ndaj Borussia Dortmund në Champions League.
