Ajo nuk e mundi virusin vetëm një herë por plot tri herë. Protagonistja është Maria Orsingher, një gjyshe 101-vjeçare e shtruar në spital në “RSA Casa San Lorenzo në Ardenno”, në Valtellina.
Për herë të parë ajo rezultoi pozitive në pranverë, gjatë valës së parë të pandemisë. Maria arriti të mposhtur virusin pas një shtrimi të shkurtër në spital, pa komplikacione.
Shtrimi i dytë daton në shator kur së bashku me një miken e saj në shtëpinë e të moshuarve, ajo rezultoi pozitive. Por edhe në këtë rast ajo arriti të kalojë situatën pa ndonjë problem. Kështu që pas pesë tamponësh negativë ajo u kthye në shtëpinë ku ka jetuar për disa vite. Por kjo nuk është e gjitha, këtë muaj Maria ishte ende pozitive. Autoritetet spitalore kanë theksuar se i treti mund të jetë pozitivitet i rremë për shkak të sistemit të ulët imunitar.
Ekspertët shpjegojnë se rastet kur pacientët riinfektohen mund të numërohen me gishtat e njërës dorë, nuk përjashtohet që disa teste të japin rezultat negativ të rremë, duke patur ngarkesë virale aq të ulët sa nuk zbulohet nga tamponi.
“Ka pasur disa episode të testeve negative në pacientë të shëruar të cilat janë pasuar nga një pozitivitet i ri që zgjat për një kohë të gjatë për një nga arsyet e përmendura më lart”, thotë Carlo Signorelli, profesor në Universitetin “San Raffaele” në Milano. Por ka gjëra që as shkenca nuk mund t’i shpjegojë ndonjëherë, si forca e pathyeshme e kësaj kësaj gruaje 101-vjeçare.
