Të paktën 34 persona mbetën viktima të dy sulmeve të veçanta me bomba në Afganistan që synuan një bazë ushtarake dhe një shef provincial.
Një makinë bombë vrau të paktën 31 anëtarë të forcës afgane të sigurisë të dielën në provincën qendrore Ghazni në Afganistan.
Zyrtarët thanë se viktimat mund të rriten, duke pasur parasysh intensitetin dhe vendndodhjen e shpërthimit.
Drejtori i spitalit provincial në Ghazni, Baz Mohammad Hemat, tha se 30 trupa dhe 24 persona të plagosur ishin transportuar atje. “Të gjitha viktimat janë personel i sigurisë,” tha ai.
Shpërthimi synoi një kompleks të forcave mbrojtjes publike, një krah i forcave afgane të sigurisë, thanë zyrtarët lokalë. Nga shpërthimi u dëmtuan banesat civile rreth kompleksit dhe mund të ketë më shumë viktima nga sa janë raportuar.
Zëdhënësi i ministrisë së Brendshme Tariq Arian konfirmoi se kishte pasur një shpërthim makine bombë, por nuk dha informacion të mëtejshëm mbi shënjestrën ose viktimat e mundshme.
Askush nuk e ka marrë përgjegjësinë për sulmin.
Zëdhënësi i Talibanëve Zabihullah Mujahid, kur u kontaktua nga Reuters, nuk e konfirmoi ose mohoi përgjegjësinë.
Afganistani ka parë një mori bombardimesh makinash gjatë muajve të fundit, pavarësisht se bisedimet e paqes po zhvilloheshin midis ekipeve negociuese të Talibanëve kryengritës dhe qeverisë në kryeqytetin e Katarit, Doha.
Një bombardim tjetër të dielën, në provincën lindore të Zabul, duke synuar një zyrtar të lartë provincial, vrau tre persona dhe plagosi 23 të tjerë, tha Gul Islam Syaal, zëdhënësi i guvernatorit të krahinës.
Haxhi Ata Jan Haqbayan, kreu i këshillit provincial të Zabul, pësoi lëndime të lehta në sulmin ndaj kolonës së tij.
Askush nuk ka marrë përgjegjësinë për sulmin ndaj Haqbayan, i cili është një kritik i hapur i Talibanëve.
