Ekipi juridik i Donald Trump pësoi një humbje tjetër në gjykatë ditën e premte teksa një gjykatë në Filadelfia hodhi poshtë përfundimisht përpjekjen e tyre të fundit për të sfiduar rezultatet e zgjedhjeve presidenciale të shtetit.
Gjykata e Apelit ka refuzuar kërkesën e ekipit të Trump për rinumërim votash. Gjykata e konsideroi çdo rishikim si të kotë.
Çështja ishte argumentuar javën e kaluar në një gjykatë më të ulët nga avokati i Trump Rudy Giuliani, i cili këmbënguli gjatë pesë orëve të argumenteve se zgjedhjet presidenciale të vitit 2020 ishin dëmtuar nga mashtrime të përhapura në Pensilvani. Sidoqoftë, Giuliani nuk arriti të ofrojë ndonjë provë të prekshme për këtë në gjykatë.
Trump ka thënë se shpreson që Gjykata e Lartë të ndërhyjë në garë, siç bëri në vitin 2000 kur vendimi i saj për të ndaluar rinumërimin në Florida i dha zgjedhjet republikanit George Ë. Bush.
Më 5 nëntor, teksa vazhdonte procesi i numërimit, Trump postoi në Twitter duke thënë se “Gjykata e Lartë e SHBA duhet të vendosë!”
Që nga ajo kohë, Trump dhe ekipi i tij kanë quajtuar zgjedhjet si të parregullta dhe kanë ngritur një mori gjyqesh në përpjekje për të bllokuar rezultatet në gjashtë shtete të fushës së betejës.
