Zërat për një largim të Leo Messit nga Barcelona sa vijnë e shtohen. Media të ndryshme europiane nënvizojnë faktin që e ardhmja e argjentinasit është vendosur dhe nuk do të ketë kthim prapa.
Por cila do të jetë skuadra e re e Leo Messi-t në rast largimi? Pleshti mund të vendosë të largohet me kosto zero nga Barcelona dhe të nënshkruajë me një klub tjetër.
Pas zërave të shumtë që kanë folur për një transferim të mundshëm të argjentinasit te Manchester City, në Angli janë të bindur se mund të ketë një tjetër pretendente për Leon: Chelsea.
Sipas The Sun, që ka cituar gazetarin spanjoll Guillem Balague, Chelsea mund të futet në garë për argjentinasin nëse ky i fundit do të lirohej me kosto zero nga katalanasit.
Londinezët nuk do të kishin asnjë problem ekonomik për t’ia paguar rrogën dhe mund të vendosë të vihet në lëvizje për goditjen e bujshme.
