Trajneri i Partizanit, Ilir Daja ditën e diel do të zhvillojë një ndeshje speciale duke u përballur me ish-skuadrën e tij, Skënderbeun.
Në prag të kësaj sfide, trajneri i të kuqve është shprehur se si profesionist do të kërkojë vetëm fitoren, por shton më tej se dëshiron të arrijë me Partizanin sukseset që arriti edhe me Skënderbeun.
Gjithashtu Daja, thotë se ndeshja ndaj ish-skuadrës së tij do të jetë e vështirë por se të kuqtë janë superiorë nga ana psikologjike.
“Kemi rritje nga java në javë, por paralelisht kemi edhe shumë gjëra për të përmirësuar. Mendoj se do të kemi vështirësi, jo vetëm ne por edhe ekipet e tjera, për shkak të ngjeshjes së kalendarit në këtë moment. Akoma më shumë e ndjejmë ne, pasi kemi pasur një grup të limituar edhe për shkak të problemeve.
Koeficienti i vështirësisë do të jetë prezent nesër, jo vetëm për këto që citova më parë, por edhe sepse Skënderbeu në transferta ka bërë paraqitja të mira. Në Durrës dhe Ballsh kanë marrë pikë dhe mendoj se nesër do të kemi një ndeshje të vështirë. Gjithsesi kemi entuziazëm brenda dhe në anën psikologjike jemi pak më mirë se Skënderbeu.
Dihet që me Skënderbeun kam kulmin e karrierës time dhe do dëshiroja ta bëja të njëjtën gjë me Partizanin. Kam kaluar shumë mirë në atë qytet ku edukata dhe kultura janë prezent në çdo moment. Nesër i kemi kundërshtarë dhe ashtu siç kam bërë me Skënderbeun duke dhënë maksimumin, ashtu do bëj edhe me Partizanin. Ky është profesioni ynë. Nesër do mendoj me të gjithë mënyrat që bashkë me ekipin të dalim me tre pikë nga ndeshja.- u shpreh Daja.
