LSI ka denoncuar atë që e ka cilësuar si aferë ndërtimi në Durrës. Sipas LSI, shkollës ”Naim Frashëri” iu veshën dëmtimet “e padukshme” nga tërmeti i 26 nëntorit 2019, me qëllim shembjen e godinës.
“Godina e gjimnazit funksionoi normalisht edhe 4 muaj pas tërmetit të 26 nëntorit 2019, deri në mars 2020, kur Ministria e Arsimit vendosi mbylljen e mësimit normal për shkak të pandemisë Covid-19. Nga muaji dhjetor 2019 deri në Mars 2020, shkolla “Naim Frashëri” ka pritur, pa problem, qindra nxënës, si edhe stafin pedagogjik”, thuhet në reagimin e LSI në rrjetet sociale.
Kjo forcë politike nënvizon se godina është vendosur për prishje edhe pse pa dëmtime, ndërkohë që godina të tjera të dëmtuara rëndë nuk marrë asnjë vëmendje apo zgjidhje.
”Pjesa më e madhe e banorëve përreth shkollës vazhdojnë të ngrenë dyshimin se godina do të prishet për t’i hapur rrugë ndërtimeve private, pallate ose qendra tregtare”, thuhet në reagimin e degës së LSI në Durrës.
