Myrto Uzuni ishte protagonist absolut për skuadrën e tij në ndeshjen me Ferencvaros dhe Juventusit në Champions League. Sulmuesi gjeti golin ndaj bardhezinjve, megjithëse në fund nuk ia vlejti sepse Ronaldo dhe Morata përmbysën gjithçka. Në një prononcim për “Panorama Sport”, beratasi tregon gjithë emocionet dhe dialogun me Ronaldon gjatë dhe pas ndeshjes.
FORMA E MIRË – “Është ndjesi shumë e bukur pasi po rikthehem në formën time më të mirë. Po rigjej formën e mëparshme, pasi qëndrova gjatë në shtëpi dhe pasi kalova COVID-19. Jam vërtet i lumtur. Gjatë ndeshjes treguam besim dhe cilësi, si me veprimin ndaj Dibalës apo edhe në momente të tjera”.
PËRBALLË JUVENTUSIT – “E kisha të qartë para ndeshjes që do të luaja me lojtarë shumë të fortë. E dija dhe isha i vendosur me besim të plotë që pa nisur ndeshja se ishte një 90-minutësh të cilin do ta ndiqte e gjithë bota. Prandaj, do të më duhej të tregoja aftësitë e mia në çdo çast, pa menduar gjatë se kë do të kisha përballë në fushë”.
HUMBJA – “Normalisht që më vjen shumë keq. Më vjen keq për faktin se bëmë një ndeshje të mirë, sakrifikuam dhe u munduam të bënim gjithçka siç duhet dhe siç e kishim përgatitur. Sigurisht që do të isha akoma edhe më i lumtur që të merrnim pikë në Torino me golin tim”.
FESTIMI I GOLIT – “Realisht nuk e mendoja atë festim, por gjithmonë e kam ndjekur Juventusin nga televizori. Dhe Ronaldo sa herë shënon, shkon te cepi i fushës…
Në ato momente, menjëherë pas golit që shënova, mu kujtua Ronaldo që shkonte atje dhe ishte thjesht mënyra… E ndjeva të bëja ashtu, pasi e kam përjetuar nga televizori shumë herë atë festim. Prandaj. Ishte thjesht diçka e momentit”.
PAS NDESHJES – “Trajneri na përgëzoi të gjithëve. Pavarësisht rezultatit, ai na uroi dhe na falënderoi të gjithëve për shpirtin e garës që treguam gjatë ndeshjes dhe që ishim të gjithë të gatshëm, në dispozicion të ekipit për të ndihmuar njëri-tjetrin. Sigurisht, edhe mua më përgëzoi për golin që shënova”.
GABIMI I PORTIERIT – “Jo nuk tha gjë, ishte vetëm trajneri ai që na foli. Trajneri na uroi për paraqitjen dhe nuk është se gaboi vetëm portieri. Ne gabojmë të gjithë dhe fitojmë të gjithë bashkë”.
BISEDA ME RONALDON – “Pas ndeshjes e falënderova. I thashë: ‘Faleminderit për fanellën’ dhe nuk mund të rrija pa i thënë: ‘Je lojtari më i mirë në botë’. Më tha: ‘Faleminderit dhe veç vazhdo të punosh’. Kur ndërruam fanellat nuk tha asgjë për festimin, por në pushim, pasi dolëm në fushë për të dytën më tha diçka. Më tha: ‘Festimi siuuu’. Dhe ma bëri me gisht duke buzëqeshur.
REAGIMET E BARDHEZINJVE – “Nuk kujtoj shumë asgjë nga reagimet e tyre. Të gjithë ishin të befasuar që ne shënuam. Si lojtarët e Juves, por edhe nga ekipi ynë u habitën”.
FANELLA – “Do e ruaj kujtim. Do e mbaj gjithmonë ne dhomën time”.
JUVENTUSI – “Ata kanë shumë kualitet. Janë lojtarë shumë të mirë dhe është bukur të përballesh me ta, sidomos në të tilla kushte kur ndeshja është e hapur deri në fund”.
GOLI I PARË HUNGAREZ NË TORINO – “Kam marrë mesazhe urimi pa fund, si asnjëherë më parë. I falënderoj të gjithë.
MARADONA – “Të gjithë kemi dëgjuar kemi dëgjuar për Maradonën dhe jo të gjithë kanë pasur fatin ta ndjekin karrierën e tij. Për fatin tim të keq unë kam ndjekur vetëm disa video në internet. Largohet një legjendë nga kjo jetë dhe na vjen keq të gjithëve, pasi ai ka lënë histori me klasin dhe talentin e tij.
ËNDRRA E RADHËS – “Ronaldo ishte motivimi im më i madh sepse edhe ai ka vuajtur dhe me punë ia doli. Ëndrra ime tani është të luaj në nivele të larta dhe të jem lideri i kombëtares.
NATA PAS NDESHJES – “Nuk kam fjetur fare. Ishte gëzim i madh dhe qëdrova pa gjumë. Edhe futurimin për në Hungari e kishim shpejt ndaj nuk fjeta thuajse fare”, përfundon Uzuni. /abcnews.al
