“Magjistrati e ushtron funksionin në mënyrë të pavarur, por ai nuk mund të veprojë në mënyrë arbitrare dhe të gjykojë rastet duke u bazuar në preferencat personale, interesin vetjak apo keqbesim, por vetëm duke u bazuar në legjislacionin në fuqi”. Ky ishte një argumentet e paraqitura këtë të enjte në mëngjes, gjatë mbledhjes me dyer të mbyllura të zhvilluara nga Këshilli i Lartë Gjyqësor, për kërkesën e Inspektoratit të Lartë të Drejtësisë për të shkarkuar gjyqtarin e Korçës, Markelian Kuqo që liroi me kusht Gert Gjinararin, i dënuar më parë me burg të përjetshëm.
Kreu i ILD, Artur Metani ka mbajtur fjalët përmbyllëse teksa ka paraqitur konkluzionet për Kuqon, për të cilin thotë se ka diskredituar rëndë figurën e gjyqtarit dhe nuk mund ta vijoi detyrën e gjyqtarit.
”Magjistrati e ushtron funksionin në mënyrë të pavarur, por ai nuk mund të veprojë në mënyrë arbitrare dhe të gjykojë rastet duke u bazuar në preferencat personale, interesin vetjak apo keq-besimin, por vetëm duke u bazuar në legjislacionin në fuqi dhe duke e interpretuar atë në varësi të rrethanave konkrete të një çështjeje gjyqësore të caktuar. Pavarësia që i njihet magjistratit nuk është një qëllim në vetvete, një privilegj personal, por është një mjet për të mbrojtur publikun, që kërkon dhe pret drejtësi”, thekson Metani.
“Pavarësia e magjistratit shkon përkrah dhe balancohet nëpërmjet një sistemi llogaridhënieje, përgjegjshmërie dhe ndëshkueshmërie. Veprimet/mosveprimet e ndërmarra nga ana e magjistratit Markelian Kuqo kanë cenuar besimin që magjistrati duhet të përcjellë te publiku në përmbushjen e misionit dhe rolit të tij në dhënien e drejtësisë, ka diskredituar rëndë figurën dhe pozitën e gjyqtarit dhe kanë ulur dinjitetin e organit që përfaqëson, duke e bërë atë të pa denjë për vazhdimin e ushtrimit të funksionit të magjistratit”, tha Metani.
Markelian Kuqo u karantinua në banesë pasi bashkëshortja rezultoi pozitive me COVID-19, kështu gjyqtari, kërkoi kohë nga KLGJ për konkluzionet e veta. KLGJ ia ka dhënë kohën duke shtyrë seancën e radhës për mesditën e 10 dhjetorit, kur do jepet dhe konkluzioni final.
