Stacioni i Policisë Kufitare Kapshticë bën me dije se sipas vendimit të autoriteteve greke, pika kufitare e Kapshticës, do të jetë e mbyllur për të gjitha llojet e mjeteve.
“Autoritetet e Policisë Greke, në bazë të një njoftimi zyrtar që i kanë dërguar Policisë Kufitare Kapshticë, sqarojnë se në zbatim të vendimit të qeverisë greke për marrjen e masave, mbi përballimin e situatës së krijuar për shkak të pandemisë COVID-19, prej datës 20.11.2020, ora 06:00 e mëngjesit, deri në datën 04.12.2020, Pika e Kalimit Kufitar Kapshticë, do të jetë e bllokuar dhe nuk do të lejohet lëvizja e këmbësorëve dhe e mjeteve (vetura, autobusa dhe kamiona) si në hyrje dhe në dalje të Greqisë”, thuhet në një njoftim të policisë.
Policia Kufitare e Kapshticës, iu bën thirrje të gjithë qytetarëve që duan të udhëtojnë drejt Greqisë, që gjatë këtij harku kohor, të shmangin udhëtimin në drejtim të kësaj pike kalimi.
Përgjatë aksit rrugor Korçë-Kapshticë, do të ketë forca policie të cilat do të mbikqyrin situatën dhe nuk do të lejojnë kalimin e mjeteve, në drejtim të Kapshticës.
Aktualisht, për të kaluar në Greqi, hapur mbtetet vetëm pika kufitare e Kakavijës.
Pavarëisht njoftimit për mbylljen e pikës kufitare, sot, janë krijuar radhë të gjata të kamionëve të mallrave në pikën e kalimit kufitar të Kapshticës.
