Gazetari i Euronews Renaldo Salianji, ka treguar ditët e vështira të infektimit me Covid-19. Ai është shprehur se virusin e ka marrë në Ballsh, gjatë protestës së naftëtarëve.
Ai ka treguar se mjekun e familjes e ka në Korçë.
“Unë kam pasur kontakt me një person të infektuar. Kam qenë gjatë grevës së urisë së naftëtarëve në Ballsh dhe njëri prej tyre ishte i infektuar me Covid-19.
Unë kam pasur kontakte të afërta me Sokol Dautaj. Pasi mora vesh që ishte i infektuar me Covid-19 vendosa të karantinohem dhe dy ditë më pas m’u shfaqën simptomat. Kam marrë në telefon 127 për të kërkuar informacion, sesi është procedura e bërjes së tamponit dhe më pas më këshilluan se duhet të referoja tek mjeku i familjes. Unë mjekun e familjes e kam në Korçë. Mjeku i familjes nuk mund ta referonte në Drejtorinë Shëndetit Publik në kryeqytet dhe pati një procedurë shumë të gjatë deri në marrjen e tamponit”, tregoi ai për “Euronews albania”.
Ai është shprehur më tej se rreth 4 ditë ka pasur temperaturë deri në 39 gradë dhe se përgjigjen e tamponit e ka marrë 10 ditë me vonesë, në rrugë jo-zyrtare.
Gazetari sqaroi se përgjigjen e tamponit e ka marrë nga një mikeshë e tij që punon në ISHP, nëpërmjet një mesazhi në whats up, por jo zyrtarisht edhe pse kanë kaluar 25 ditë.
