Shqipëria po përballet me pandeminë Covid-19, e cila duket se ka dalë prej javësh jashtë kontrollit, ndërsa ka një rritje eksponenciale të rasteve të reja, por edhe numrit të vdekjeve nga koronavirusi.
E vetmja gjë që duket se nuk ka ndaluar së funksionuari, madje edhe në periudhën e izolimit total të vendit janë betonieret.
Madje në Tiranë, atyre duket se i është krijuar edhe një korsi e veçantë. I sheh kudo, orë e pa orë, madje edhe në atë që quhet “ora policore”.
Betonieret kanë një mbrojtje të veçantë, nga një personazh me uniformë, madje edhe policia është e pafuqishme për ti ndalur.
Dhe jo vetëm! Betonieret janë më të rëndësishme edhe se ambulancat, që janë të detyruara të presin në trafik jo 1 dhe 2 minuta, por mbi 10 të tilla.
Në kushtet kur çdo sekondë mund të jetë e vlefshme për të shpëtuar jetë njerëzish dhe ndoshta në këtë periudhë ajo korsia e famshme për ambulanca vërtet duhej të funksionte, kjo nuk ndodh,
Mish-mashit të trafikut në Tiranë, të krijuar me ndërhyrjet pa kriter nga Bashkia, i shtohen edhe betonieret.
Betonieret që transportojnë llaç kanë shumë më shumë rëndësi se ambulancat që transportojnë njerëz.
Ndoshta këta të fundit thjesht trajtohen si numra. Madje edhe kur deklarohen jetë të humbura thjesht thuhet numri, i shtohen nga pas edhe mosha. Edhe kur raportohen rastet e reja sërisht raportohet shifra, pra numri i të prekurve të rinj.
Ndërsa betonieret nuk janë numra, janë para dhe paraja për disa është shumë më e rëndësishme se jeta e njeriut.
Video e mëposhtme tregon më së miri atë që ndodh. Është një ambulancë te Unaza e Re, e cila me sirena ndezur transporton një të sëmurë ose shkon për ti dhënë ndihmën një pacienti. Është e detyruar të presë në trafik dhe para saj, shumë përpara është një nga ato betonieret.
Bluzat e bardha nuk kanë fuqi aq sa thuhet, ndoshta i duhet të mbajnë në kokë edhe një kapele, si puna e Erion Ahmetit. Vetëm atëherë mund të mendojnë se do të kenë fuqinë e betonieres dhe atij që i krijon luksin atyre të lëvizin, të shtojnë kaosin dhe të bllokojnë trafikun.
