Gjykata e Posaçme vendosi të kalojë për gjykim themeli dosjen ndaj ish-kryeprokurorit Adriatik Llalla.
Ish-shefi i akuzës në vend akuzohet për veprën penale: “Refuzim për deklarimin, mosdeklarim, fshehje ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Në seancën e sotme, avokati mbrojtës i Llallës, Sokol Hazizaj, ka kërkuar pushimin e çështjes, pasi nga ana e prokurorisë SPAK nuk ekziston asnjë provë që ta ngarkojë me përgjegjësi penale.
Për avokatin Hazizaj, vendimi për të kaluar rastin për gjykim dëshmon se ka qenë i paragjykuar.
Ndërkohë, Gjykata i ka hequr sekuestron e pasurive ish-kryeprokurorit. Llalla ka mbajtur gjithnjë qëndrim mohues ndaj akuzave, duke e cilësuar hetimin ndaj tij si një goditje politike.
Ish-kryeprokurori, sipas raportimeve në media pak ditë më parë, u transportua drejt Turqisë për shkak të gjendjes jo të mirë shëndetësore që shfaqi pas infektimit me koronavirus.
