Është mbyllur pjesa e parë mes Shqipërisë dhe Bjellorusisë e vlefshme për grupin 4 të Ligës C në Nations League.
Kuqezinjtë kryesojnë me rezultatin 3-1 në ndeshjen ku na intereson vetëm fitorja. Dy gola për kombëtaren tonë u shënuan nga Sokol Cikalleshi. Goli i parë erdhi në minutën e 20-të. Pas një harkimi të Memollës nga e majta, bomberi kuqezi nuk fal me kokë duke tundur rrjetën.
Dyfishimi i shifrave erdhi vetëm 7-të minuta më vonë teksa këtë herë, Cikalleshi realizoi nga pika e bardhë e penalltisë.
Gjithsesi miqtë ngushtojnë diferencat në minutën e 35-të me Skavish. Sulmuesi kundërshtar përfiton nga një gabim në mbrojtje i Ismajlit, duke mposhtur Berishën.
Pjesa e parë do të rezervonte dhe një gol të tretë për kuqezinjtë, këtë herë me anë të Rei Manaj. Finalizim mjaft i bukur i lushnjarit pas asistit të Gjasulës, teksa nuk fal brenda zonës, ku me një gjuajte potente, e dërgon topin në rrjetë.
