Edy Reja foli pas fitores me Bjellorusinë, që e ngjiti kombëtaren tonë në Ligën B të Nations League.
Duke folur për Supersport, trajneri italian këmbënguli se u duhet dhënë merita futbollistëve për sakrificat e tyre në fushën e blertë ndaj një kundërshtari shumë të fortë fizikisht.
Tekniku italian, gjithashtu nënvizoi faktin që Shqipëria duhet të përmirësohet për sa i përket aspektit fizik teksa lodhja u vu re në fundin e ndeshjes.
“Shumë prej lojtarëve që janë aktivizuar nuk luajnë as në klubet e tyre. Ju e dini, nuk mund të pretendonim që në 3 ditë të ishin në formë të mirë fizike. Për sa kohë ishim mirë fizikisht, e kontrolluam ndeshje. E lëshuam për pak takimin.
I komplimentoj shumë lojtarët se dhanë maksimumin. Nuk mund të bëjmë kritika. Kemi fituar 3 ndeshjet e fundit. Më pëlqen të luaj mirë kur i kemi mundësitë. Tani na duhej rezultati, e morëm me meritë. Djemtë treguan se e duan Kombëtaren dhe duhet t’u japim meritat. Shpirti, agresiviteti që luftuan deri në fund. Memolla ka një muaj që s’luan, Ismajli dy muaj, Gjasula nuk luan. Veseli ka 3 ndeshje që luan vetëm me ne. Bjellorusia është e fortë fizikisht, ishte e vështirë t’i përmbanim. Luajnë fort dhe në lojën në ajër.
