Shtyhet seanca ndaj Gjyqtares Mimoza Margjeka. Shkak i shtyrjes së seancës u bë mungesa e gjyqtares.
Margjeka akuzohet nga SPAK për korrupsion, pasi sipas Prokurorisë së Posaçme, Margjeka ka marrë 6000 euro në këmbim të nxjerrjes së Orion Balit nga qelia kundrejt “garancisë pasurore”.
Së bashku me Margjekën, SPAK mori nën hetim edhe bashkëshortin e gjyqtares, Arben Cara, avokatin e Balit, Skënder Demiraj, vëllanë e të pandehurit Nejton Balin dhe Klaudjo Zhillën.
E lënë nën masën e sigurië “arrest shtëpie”, Margjeka ka akuzuar në seancat e mëparshme, se akuza ndaj saj ka prapaskena politike. Sipas saj, lidhet me vendimin për mandatin e kryetares së Bashkisë së Durrësit, Valbona Sako, të dalë nga votimet e 30 Qershorit. Kujtojmë se Margjeka nuk pranoi të certifikonte mandatin duke argumentuar se, partia Bindja Demokratike ishte regjistruar përtej afateve ligjore dhe për pasojë fleta e votimit, ku ndodhej edhe kandidatja e Partisë Bindja Demokratike, ishte e pavlefshme.
