Italia po përballet me shifra gjithnjë e në rritje si pasojë e pandemisë Covid-19, duke kaluar pothuajse në numrat e njëjtë me ato të valës së parë. Gjatë 24 orëve të fundit, vendi fqinj ka raportuar për 731 viktima dhe 32.199 të infektuar.
Numri i viktimave nga Covid në Itali ka arritur deri më sot në 46,464 ndërsa i të infektuarve në 1.258.072. Dita e sotme ka regjistruar 538 pacientë më shumë të shtruar për kurim në repartet spitalore dhe numri aktual është 33.073.
Në repartet e terapisë intensive janë shtruar edhe 120 pacientë duke e çuar në 3.612 numrin e tyre të përgjithshëm në nivel kombëtar. Aktualisht, janë 733.810 raste aktive pozitive me Covid në Itali.
Sipas autoriteteve italiane, mbetet kritike situata e shërbimit shëndetësor spitalor në 11 rajone ku numri i shtretërve në repartet Covid e në ato të terapisë intensive është drejt ezaurimit të tyre. Kuota 30 % e përcaktuar për pacientet e infektuar nga koronavirus është kapërcyer në 11 rajone nga 21 që ka vendi, gjë që vë në vështirësi shërbimin shëndetësor për pacientë që vuajnë patologji të tjera.
