Nënkryetari i PD-së, Edi Paloka, akuzon Kryeministrin Edi Rama si gënjeshtar. Në rrjetet sociale, Paloka shkruan se Rama gënjen për çdo gjë.
“Gënjen e gënjen për çdo gjë, madje dhe atëherë kur mund të mbyllë gojën e të hesht nuk i rrihet pa gënjyer!”, shkruan Paloka.
Reagimi i nënkryetarit demokrat, ka ardhur pasi Kryeministri Rama një ditë më parë, nga qyteti i Vlorës, ndërsa deklaronte se spitalet tona publike nuk kanë asgjë më pak se ato të Gjermanisë, Turqisë apo Italisë, tha se ministrat e tij që janë prekur nga COVID 19 nuk kanë shkuar jashtë për kurim, por janë kuruar në spitalet tona publike.
Por mediat raportuan se ministri i Mjedisit dhe Turizmit Blendi Klosi, që ka qenë i vetmi që ka patur nevojë për kurim spitalor, nuk është trajtuar as në spitalin publik COVID 1, as në spitalin publik COVID 2 dhe as në spitalin publik COVID 3.
Sipas mediave, Klosi është shtruar dhe kuruar në një spital privat në Tiranë dhe Edi Rama për këtë ka dijeni të plotë.
