Vaksina që pritet të dalë së shpejti pretendohet se ka një efektshmëri prej 90 për qind. Vullnetarët që kanë marrë vaksinë e koronavirusit të prodhuar nga Pfizer kanë thënë se efektet e saj anësore janë të ngjashme me gjendjen e drobitur, që vjen pas konsumit të ekzagjeruar të alkoolit.
Raporti mbi efektet anësore të vaksinës që deri tani rezulton e sigurt, vjen disa ditë pasi Pfizer dhe partnerët e saj gjermanë BioNTech njoftuan se efektiviteti parandalues i injeksionit është deri në 90 për qind dhe se porositë shtetërore kanë nisur tashmë për blerjen e saj.
Gjatë testimeve, rreth 43,500 vullnetarë nga gjashtë shtete morën injeksionin, pa u treguar nëse ishin injektuar me vaksinën apo më një ‘placebo’, duke iu referuar injeksionit të paefektshëm që jepet për të studiuar efekte të mundshme psikologjike.
Lidhur me vaksinën 44 vjeçari Glenn Deshields, nga Austin, Texas, tha se efektet e vaksinës ishin të ngjashme me “një gjendje të rëndë si ajo pas konsumit të alkoolit,” por që largohej pas pak kohësh.
Prodhuesit thonë se Deshields kishte krijuar anti-trupa pasi mori 2 injeksionet e vaksinës së vërtetë.
Një grua 45-vjeçare nga Missouri tha se kishte pasur ethe, dhimbje trupore pas injeksionit të parë, dhe të tjera efekte të ngjashme me gripin, madje edhe më të rënda pas injeksionit të dytë.
Në një deklaratë mbi efektivitetin e vaksinës, kreu i Pfizer, Dr Albert Bourla, tha: “Sot është një ditë e madhe për shkencën. Rezultatet e para të testimeve provojnë aftësinë e saj për të parandaluar Covid-19.”
Kjo është vaksina më e kërkuar nga vende të ndryshme të botës dhe pritet të jetë gati në fillim të dhjetorit. Shqipëria shpreson ta ketë në dispozicion në fillim të vitit të ardhshëm, vaksinë që besohet se do të shpërndahet edhe për vendet anëtare të BE-së.
