Sipas deklaratës më të fundit nga BE, rritja e ekstremizmit të dhunshëm në Europë vjen si pasojë e mosintegrimit të emigrantëve në shtetet pritëse.
Pas një jave mosmarrëveshjesh për shkak të deklaratave të Francës, Austrisë dhe Gjermanisë për të rritur kufizimet kundër terrorizmit, referencat në lidhje me islamin u hoqën bashkë me kërkesat që të sapoardhurit të mësojnë gjuhën e ‘’shtëpisë së re’’ apo që të sigurojnë vetë jetesën.
Sidoqoftë, kryeqytetet e BE-së theksuan nevojën për të përmirësuar kohezionin shoqëror në Europë, si përgjigje ndaj sulmeve në Vjenë e Francë.
“Integrimi është një rrugë dykahëshe,” thuhet në deklaratë. “Kjo do të thotë që emigrantët pritet të bëjnë një përpjekje aktive për t’u integruar.”
Deklarata e lëshuar në përvjetorin e pestë të sulmeve në Paris, në teatrin Bataclan dhe jashtë Stade de France parashtroi disa nisma të reja politike.
Bisedat për sanksione kundër atyre që nuk arrijnë të integrohen u hoqën dhe u zëvendësuan me një paralajmërim më të butë për OJQ-të që janë raportuar si shkelëse të ligjeve.
Organizatat që nuk veprojnë në përputhje me legjislacionin përkatës dhe mbështesin përmbajtjen që është në kundërshtim me të drejtat dhe liritë themelore nuk do të mbështeten nga fondet publike, as në nivelin kombëtar dhe as në atë europian. Gjithashtu, ndikimi i jashtëm i padëshirueshëm i organizatave kombëtare civile dhe fetare përmes financimit jo-transparent do të jetë i kufizuar.
Më parë gjatë javës, Charles Michel, presidenti i këshillit Europian dhe një ish-kryeministër i Belgjikës, bënë thirrje për krijimin e një instituti europian për të trajnuar imamët. Megjithatë BE duket se nuk e ka marrë parasysh, duke u mjaftuar me kërkesën që promovimi fetar të jetë në përputhje me të drejtat dhe vlerat themelore europiane. /The Guardian
