Një sërë problematikash janë ngritur nga mësues të arsimit parauniversitar gjatë një takimi me kryetarin e Partisë Demokratike, Lulzim Basha.
Gjatë takimit, një prej arsimtarëve, tha se shumë mësues po fshehin faktin që po kalojnë apo e kanë kaluar Covid-in. Arsyeja, sipas tij, është frika e heqjes nga puna, por edhe se familjarë të tyre detyrohen të karantinohen dhe në një rast të tillë ndërpriten të ardhurat ekonomike.
Një tjetër problematikë që u ngrit ishte transporti i mësuesve, që sipas arsimtarëve, bëhet pa masa mbrojtëse dhe pa u respektuar protokollet e sigurisë.
Ngarkesa e tepër mësimorë u prek po ashtu në takim, me mësues që deklaruan se kanë dhënë dyfishin e orëve në rastet kur kolegë të tyre kanë munguar për shkak të Covid, por nuk janë vlerësuar financiarisht. Po ashtu, u raportua mungesa e mësuesve zëvendëses në këto raste.
Probleme të tjera që u ngritën nga arsimtarët ishin mungesa e një plani konkret në rastet kur një nga nxënësit rezulton pozitiv me Covid, moskryerja e tamponëve për mësues që kanë pasur kontakte me kolegë të konfirmuar pozitiv me koronavirus, termometra jofunksionalë në shkolla, si dhe mungesa e psikologëve në institucionet arsimore.
Basha tha se, “prej fillimit kemi kërkuar edhe do vazhdojmë të kërkojmë që ju të keni trajtimin që kemi kërkuar dhe për mjekët dhe infermierët. Trajtim mbrojtës do të thotë depistimi, pra testimet tuaja të vazhdueshme si kategoria më e ekspozuar pas mjekëve dhe infermierëve dhe kjo është arsyeja që prej fillimit kërkova testim masiv të gjithë mësuesve kur fillojë sezoni arsimor”.
Së dyti, shtoi kryedemokrati, “marrja e masave në ambientet arsimore, higjenizimi, uji i rrjedhshëm, pastrimi, dezinfektimi dhe maskat. Çfarë i kushton shtetit të blejë mjaftueshëm maska falas për arsimtarët? Kjo është arsyeja se pse duhen protokolle të qarta, protokollet e ajrosjes, të ventilimit, oraret kur ju duhet të dilni dhe të merrni frymë lirisht, të hiqni maskën, siç e kanë ato vende të cilat ndjekin këto praktika të pranisë së kufizuar”.
Basha premtoi dhe paga “të paktën 700 euro” për mësuesit, në qeverisjen e Partisë Demokratike.
