Kryetari i Partisë Demokratike, Lulzim Basha premtoi këtë të Enjte paga “të paktën 700 euro”, për mësuesit e arsimit parashkollor.
“Brenda 4-vjeçarit tonë të parë rroga minimale e mësuesit do jetë 700 euro”, deklaroi Basha në një takimi me mësues, ku u diskutua për problematikat që ata hasin në ushtrimin e profesionit të tyre, sidomos në këto kohë pandemie.
“Po s’ka pagë, s’ka dinjitet”, deklaroi kryedemokrati.
Lideri i opozitës tha se nën qeverisjen e PD-së, niveli i financimit për arsimin në tërësi do jetë jo më pak se vendet e rajonit dhe do synojë si përqindje buxheti, atë të Bashkimit Europian.
Basha shtoi se rëndësi do i kushtohet jo vetëm arsimit të lartë, por edhe atij profesional dhe parauniversitar.
Drejtuesi i PD premtoi tekste falas për të gjithë nxënësit e klasave nga e para te e nënta. “Synimi do të jetë që asnjë bir apo bijë shqiptari të mos mbetet pa studiuar për shkak të rrethanave ekonomike të familjes“, tha Basha.
