Nga BoldNews.al
Një medikament, shumë i shtrenjtë dhe që thuhet se shërben për të luftuar Covid-19, po qarkullon ilegalisht në farmacitë e Tiranës.
“Favira”, e njohur edhe si “Favicovir”, një medikament i paregjistruar në Shqipëri, gjendet si pjesë e kurës që persona të ndryshëm ua japin individëve të prekur nga virusi SARS-VOC-2.
“Boldnews.al” ka mësuar se ky medikament nuk lejohet të qarkullojë në Shqipëri, pasi efektet e tij nuk janë të provuara.
Por, megjithatë, “Favira” dhe “Favicovir” qarkullon realisht në farmaci të ndryshme.
“Boldnews.al” ka siguruar foto, të shkrepura nga një prej farmacive të Tiranës, ku ky medikament ilegal gjendet rëndom.
Të dhënat e siguruara nga redaksia tregojnë se ky lloj ilaçi është shitur deri në 3 mijë euro, për pacientët e dëshpëruar nga prekja prej Covid-19.
Disa portale turke i atribuuan autoriteteve shëndetësore të Ankarasë fraza, sipas të cilave “Favicovir”-i ishte një ndër medikamentet më të mira për të luftuar Covid-in.
Megjithatë, këto fraza nuk rezulton të jenë konfirmuar zyrtarisht. Për më tepër, medikamenti “Favicovir” nuk është përmendur nga autoritetet prestigjioze ndërkombëtare si një ndër kurat e nevojshme për të luftuar me sukses pandeminë.
Pavarësisht të gjitha këtyre, “Favira” dhe “Favicovir” qarkullon lirshëm në Tiranë, duke hyrë në Shqipëri në mënyrë kontrabandë.
Ky lloj medikamenti nuk mund dhe nuk duhet të jetë në Shqipëri, referuar të paktën parashikimeve ligjore.
Por ai, jo vetëm që është, por u ka kushtuar pacientëve të ndryshëm “një djall e gjysëm”, nën rekomandimin e mjekëve të caktuar.
Pikërisht, në këtë moment ka vend për disa pikëpyetje të mëdha; Cilët persona kanë autoritet kaq të lartë në Shqipëri që të lejojnë kontrabandën e një medikamenti të shtrenjtë, të patestuar për rezultatet dhe, aq më tepër t’ua japin me recetë pacientëve të ndryshëm?
Duket qartë se personat që fshihen pas kësaj situate, që mund të konsiderohet pa frikë “aferë”, duket se kanë pushtet të lartë ose janë të aftë të luajnë fijet e pushtetit, duke përdorur jo vetëm lidhjet e duhura, por, ndoshta, edhe imazhin mediatik.
