Jozefina Topalli, drejtuese e “Lëvizjes për Ndryshim” tha në emisionin “Open” se gabimi që është bërë në këto 30 vjet të politikës shqiptare, si nga PD ashtu edhe nga PS, është fakti se ministra janë vendosur disa 30-vjeçarë.
Topalli tha se duke i vendosur këta individë si ministra, vetëm i kemi pasuruar.
“Kemi bërë një gabim të madh, kemi vendosur ministra persona 30-vjeçarë që janë pasuruar edhe më shumë. Sot mendoj se duhet të ketë një “mea culpa” nga të gjithë për ato që kemi bërë në këto 30 vite.
Nuk ka të bëjë me moshën, pasi mund të jesh i ri dhe ke mentalitetin e një të vjetri”, tha Topalli.
Ajo i ka drejtuar një apel demokratëve, si dhe të pakënaqurve nga 3 liderët aktualë politikë, që të mbështesin lëvizjen e saj politike.
“Dalloj te anti-korrupsioni, nga interesi publik dhe ai privat dhe jo nga ngatërrimi i këtyre të fundit. Unë s´kam marrë as pronat e mia nga babai, vetëm se kam pritur ligjin”, tha Topalli.
Lidhur me dekriminalizimin që konsiderohet si një nga meritat e Lulzim Bashës, gjatë viteve të opozitës dhe drejtimit të PD, Topalli tha se ky ligj është miratuar prej saj dhe grupit të saj parlamentar.
“Në fakt është koherencë përgjatë kësaj periudhe për të mbrojtur parimet që unë kam besuar. Nuk e di se sa skena është e majtë dhe e djathta që quhet e djathtë, kam rezervat e mia.
Por sigurisht jam kundra një sjellje politike ku brenda forcave politike, është minimizuar jeta politike, është vrarë vota debati dhe jeta e gjallë brenda strukturave politike.
Duke u tkurrur dhe duke u bërë monopol i kryetarëve të tyre, unë ruaj koherencën time, me bindjet e mia, në atë që unë kam besuar çfarë do të thotë një parti politike.
Sot ne jetojmë në një krizë shumtë të fortë dhe secili prej nesh e mendon. Kjo është një arsye tjetër që të bën të mendosh a është momenti të ndërmarrësh një sfidë. Sfidat nuk kanë garanci, sepse ajo nuk do të ishte një e tillë.
Por pa sfida nuk vjen ndryshimi, a jemi në një kohë krize, atëherë gjëja që secili mendon kriza çfarë do të thotë. Ajo do të thotë që diçka po vdes dhe nuk lind. Sikur të mos kishte politika përçarëse a nuk do të ishin bashkë siç kanë qenë këto 20 vite.
Në qoftë se brenda asaj force politike do të qëndronin parimet. Në këtë aspekt duke gjetur se cili është shkaktari i kësaj situate, kupton nevojën e krijimit të një alternative.
Sot skena politike shqiptare ka krijuar një situatë, në të cilën, jo pak sipas sondazheve këto shkojnë në 40%, po të pyesësh se për kë votoni, ata nuk votojnë për Edi Ramën, nuk pranojnë Ilir Metën dhe nuk llogarisin Lulzim Bashën.
Ata nuk dinë se ku ta çojnë votën. Prandaj duhet një alternativë dhe ato të dërgojnë votën e tyre e të ndihen të përfaqësuar”, tha Topalli.
