Ministrja e Shëndetësisë, Ogerta Manastirliu njoftoi këtë të Martë se ka firmosur urdhrat e njoftuar dje nga Komiteti i Eksperteve ndaj Covid, për masat e reja.
Masat parashikojnë mbylljen e bareve dhe restoranteve (përveç atyre “delivery”) nga ora 22 deri në 6, si dhe kufizimin e lëvizjes në të njëjtin orar.
Manastirliu kujtoi se përjashtim nga kufizimi i lëvizjes gjatë orarit të ndaluar, do të ketë për ata persona që kanë emergjenca shëndetësore, që lëvizin për arsye pune, apo që kanë “arsye të domosdoshme”. Ajo shtoi se për lëvizje për arsye pune apo të domosdoshme nga fasha orare 22-6, duhet që qytetarët të pajisen me leje që do të merren në portalin e-Albania.
“Personeli i shëndetësisë, punonjësit e strukturave të shërbimeve kritike, përjashtohen nga rregulli i aplikimit në portalin e-Albania, duke patur dokumentacionin që vërteton punësimin pranë institucioneve”, tha Manastirliu në një deklaratë për mediat.
Administrata do punojë online sipas vlerësimit të sektorëve, deklaroi ministrja, ndërsa shtoi se do ketë një vendim të Këshillit të Ministrave për këtë kategori.
