Nga BoldNews.al
Në spitalet Covid në vend vijojnë rastet e pacientëve të cilët tentojnë vetëvrasjen, ndërsa mbeten mister arsyet që i detyrojnë të ndërmarrin aktin ekstrem.
Këtë të Martë, u shënua një tjetër rast i rëndë në spitalin “Infektiv” në Tiranë, i kthyer tashmë prej kohësh në spital Covid. Policia njoftoi se “rreth orës 12:30, dyshohet se është vetëhedhur nga lartësia e një spitali shtetasi R.G., 69 vjeç, i cili ndodhet në spital, nën kujdesin e mjekëve”.
Precedentët
Kujtojmë se ky është rasti i katërt i pacientëve që vetëhidhen nga spitalet Covid. Tre raste të mëparshme kanë rezultuar fatale për jetën e pacientëve.
I pari është regjistruar më 13 gusht, ku 29-vjeçari Xhino Koça nga Durrësi u hodh nga kati i tretë i “Shefqet Ndroqit” dhe për pasojë ndërroi jetë. Në 2 shtator, Hasan Mira, 65 vjeç, i dha fund jetës duke u hedhur nga kati i katërt i “COVID 2” vetëm dy ditë pasi ishte shtruar aty. Rasti i tretë ishte ai i Preng Gjonajt, 52 vjeç, me origjinë nga Tropoja e me banim në Tiranë, i cili ndërmori aktin ekstrem në 1 nëntor, duke u hedhur nga “Sanatoriumi”.
Për të gjitha rastet është njoftuar nisja e hetimeve, por deri më tani nuk ka pasur akuza të ngritura nga prokuroria.
Shqipëria rast unik
Nga një monitorim i mediave fqinje, ajo që konstatohet është se të tilla raste nuk janë raportuar në këto shtete. Nuk ka raportime për vetëvrasje apo tentativa vetëvrasje në spitalet Covid në Kosovë, Maqedoninë e Veriut, Mal të Zi, Greqi apo Itali.
Cilat janë arsyet?
Por cilat janë arsyet që në spitalet Covid në Shqipëri ndodhin të tilla ngjarje?
Në një intervistë disa ditë më parë, e ëma e të riut që i dha fund jetës duke u hedhur nga kati i tretë i “Shefqet Ndroqi” në muajin Gusht, hodhi akuza për mungesë të trajtimit psikologjik ndaj të birit. Ajo deklaroi se konsultat me psikologë mund të shmangnin ngjarjen.
Në media janë raportuar po ashtu denoncime për mungesë të kushteve në spitalet Covid, si ushqimi, ndalimi i komunikimit të pacientëve me familjarë, etj.
Entela Binjaku, në një prononcim për “BoldNews.al” deklaron se, “në kushtet e pandemisë, lodhja psikike, mosbesimi tek institucionet e kujdesit shëndetësor, frika prej të pakthyeshmes, historitë e mëparshme për jetë të humbura dhe izolimi prej çdo kontakti që jep besim, mbështetje apo komunikim të ngrohtë, e çojnë individin drejt humbjes së ekuilibrit mendor”.
Në kushte të tilla, shton ajo, ai rrit prirjen për akte të tilla.
Lexo edhe:
Shqiptarët e shtruar në institucionet spitalore, çfarë i shtyu disa qytetarë drejt vetëflijimit?
