Jozefina Topalli, drejtuese e “Lëvizjes për Ndryshim” tha mbrëmjen e sotme në studion e “Open” se në garën për zgjedhjet e 25 prillit ka kundër oligarkët, krimin, të korruptuarit, si dhe liderët politikë që sot kanë zaptuar skenën politike, Edi Rama, Ilir Meta dhe Lulzim Basha.
Topalli u pyet nëse do të bashkonte mandatet me opozitën e bashkuar, nëse kësaj të fundit do i duheshin për të formuar qeverinë, ndërsa theksoi “demokratëve nuk do t´i mungojë kurrë mbështetja apo mandati, por me një kusht: Kryeministër nuk mund të jetë një i korruptuar”.
“Nëse ato do të duan të vendosin Kryeministër një të korruptuar, atëherë le të bëhen dhe të rrinë të tre bashkë, Rama, Meta dhe Basha”, u shpreh Topalli.
E pyetur se ku do të kandidojë si deputete më 25 prill, Topalli tha se është ende herët.
“Jemi shpejt ende për të vendosur se ku do të kandidoj. Jemi në fazën e organizimit, por mund të them se nuk ka rëndësi se ku kandidoj unë”, tha ajo.
