Numri i mësuesve të prekur nga Covid-19 në qarkun e Korçës vijon të rritet ndjeshëm, ndërsa raportohet për rreth 100 raste.
Sipas të dhënave nga ky qark, në Bashkinë e Korçës janë evidentuar 50 mësues, në Pogradec 20 mësues dhe 30 të tjerë janë raste të shpërndara në zonat e tjera të qarkut.
Sipas procedurës, mësuesit e infektuar pasi vendosen në karantinë të menjëhershme, u merret tamponi rasteve të kontaktit dhe bëhet zëvendësimi nga mësues në listën e portalit.
Bashkia e Korçës kohët e fundit ka bërë thirrje edhe për mësues vullnetarë.
Ndërkohë janë 8 nxënës të infektuar me Covid 19 në Pogradec, konfirmon DSHP, po ashtu mendohet të jenë mbi 20 nxënës në Korçë.
Pavarësisht numrit të lartë të mësuesve të infektuar, DSHP nuk pranon që institucionet arsimore të jenë kthyer në vatra infeksioni.
Që prej fillimit të pandemisë e deri me tani janë infektuar rreth 220 mësues në të gjithë qarkun.
