Infermieri Enver Maloku, i cili ishte i shtruar prej dy javësh te Infektivi, pas infektimit me Covid-19, ka ndërruar jetë.
Mësohet se gjendja shëndetësore e Malokut është përkeqësuar ditën e sotme, pas dy javësh trajtim mjekësor.
Enver Maloku shërbente si infermier tek klinika 1 kirurgjikale. Për ndarjen e tij nga jeta ka ardhur edhe një reagim nga kolegët.
Renato Osmenaj, i njohur ndryshe si Xhaxhi Doktori i ka dhënë lamtumirën Malokut.
“Lamtumirë vëlla i mirë! Falë “masave të qeverisë” sot u largove nga ne njësoj i qeshur! Mirë u takofshim vëlla i bardhë!”- shkruan Osmenaj.
Ndërkohë shoqata e Infermierëve të Shqipërisë në një postim në rrjet shkruan se ndarja nga jeta e Malokut është një humbje e madhe për familjen por dhe për koleget dhe pacientet që e njohën.
“Do të kujtojmë gjithmonë të qeshur dhe të gatshem për ti shërbyer pacientëve ashtu si vetëm ti dije.
Shoqata e Infermierëve të Shqipërisë i shpreh ngushëllime të përzemerta familjes dhe miqve të tij. Humbje që na trishton të gjithëve.
Fatkeqesisht askush nuk është imun ndaj këtij virusi vdekjeprurës sidomos infermierët…”, thuhet në reagim.
