Nga Boldnews.al
Nëse hidhet një themel Lali është aty, nëse pritet një shirit, Lali është aty, nëse hapet një derë, çelësat i ka Lali, nëse mbyllet “porta e mendjes” me propagandë, çelësat e saj i kanë Lali Eri dhe Edi Rama. Në pak fshtra të Tiranës po bëhet fushatë me tërmetin, shkatërrimin e tij dhe ndërtimin e ndonjë shtëpize e cila më shumë se nevojë të padiskutueshme për hallexhinjtë, po shërben si mashtrim i madh për fushatën e zgjedhjeve.
Ka një urdhër të prerë që përgjatë këtyre muajve çdo banesë e ndërtuar duhet të kalojë më parë nga dyshja Rama-Veliaj, të cilët kanë një skenar të vjetër. Në fillim Veliaj tregon me duar sesi e ndërtuan banesën, si i erdhën në ndihmë çunat ndërtues dhe se çfarë i thonte “moma shpisë” që priste të ndërtohej objekti.
Më pas Rama ulet me të zotët e shtëpisë, zakonisht ndonjë çift i moshuar dhe lëshon batutat: “mbaje mirë këtë”-i drejtohet të moshuarit për bashkëshorten e tij -“patjetër”-duhet të thotë i moshuari, duke vijuar: “ajo është zonja e shtëpisë”.
Këto fraza i ka mësuar i madh dhe i vogël në fshatrat e Tiranës dhe ky është një skenar nga ku askush nuk duhet të dalë jashtë tij. Çunat e propagandës në Bashkinë e Tiranës lodhen ca, pasi në jo pak raste banorët e zonave ku ndërtohet ndonjë shtëpizë nuk impostohen mirë para kamerave. Kanë emocione, ndonjëherë harrojnë edhe tekstin, por në përgjithësi ia kanë dalë…
Nën atë banesë të re, të ndërtuar për tre javë, e cila detyrimisht merr debat më vete për nga cilësia, nuk strehohet vetëm një familje, por po përdoret si “kala” për të mbajtur pushtetin me mashtrim dhe imazh.
Ndërsa Lali Eri flet me tundje e shkundje duarsh, ku një në dy fjali e ka: “djemtë kanë bërë një punë të mrekullueshme”, Rama ngjesh pas fytyrës një maskë me një trendafil të madh në buzë. Është trëndafili i “partisë”, ai i dikurshmi i PS-së i cili ka kohë që është tharë, por vetëm me botën surreale “3D” po e shpërndajnë sikur ekziston “Rilindasit” e shekullit XXI.
Me fatkeqësinë e të prekurve nga tërmeti i 26 nëntorit të vitit të kaluar po luhet në fushatën elektorale. Qëllimi nuk është të marrin votën e familjarëve të të prekurve, por ky mësazh të shpërndahet gjerësisht, për të krijuar iluzionin se po rindërtohet në zonat e prekura dhe se qeveria është aty për ti ndihmuar.
Në të vërtetë nuk ka rëndësi për ta puna konkrete. Në vend të ekskavatorëve që hapin themelet e banesave shërbejnë kamerat, në vendin e ustallarëve, propagandistët me pagesë të Rilindjes dhe si maja e “çatisë” dy “dordolecë” me pamjen e personazheve politik që për të mbajtur pushtet kanë tetë vite që shesin vetëm propagandë!
