Punonjësit e administratës pritet të punojnë nga shtëpia, bazuar në disa grafikë që do të hartohen nga vetë institucionet, ndërsa baret dhe restorantet pritet të mbyllen pas orës 22:00.
Këto duket se do të jenë masat e para që do të merren javën e ardhshme nga Qeveria, ndërsa pritet që propozimet të zyrtarizohen rreth datës 12 nëntor nga komiteti i ekspertëve për kontrollin e pandemisë.
Burime nga ky komitet bëjnë me dije se shtimi i rasteve me Covid-19 dhe numri i lartë i pacientëve në spitalet Covid, pritet të pasohet nga masat e reja kufizuese, të cilat nuk përjashtojnë as mbylljen zonale, në ato qytete, që konsiderohen si zonat e kuqe të pandemisë.
Në këto kushte, Tirana duket se përbën edhe zonën kryesore në përhapjen e infeksionit, duke pasur 175 vatra, ndërsa në total numri i të infektuarve llogaritet në mbi 5135 persona.
Durrësi, Fieri, Korça, Elbasani dhe Shkodra, gjithashtu konsiderohen si vatra të nxehta për përhapjen e infeksionit, por me raste shumë më të pakta se Tirana.
Prej gati 1 muaji, kur u vendos edhe mbajtja e maskës me detyrim në mjediset e hapura, nuk ka pasur asnjë përmirësim të situatës lidhur me pandeminë, madje ka një shtim të rasteve. Kjo edhe për faktin se maska në ambientet e hapura nuk ndihmon në mospërhapjen e infeksionit, ndërsa Qeveria lejoi funksionimin e bareve dhe restoranteve edhe në ambiente të mbyllura, duke përcaktuar disa rregulla, që në shumicën e rasteve duket se nuk zbatohen.
Burime nga Komiteti Teknik bëjnë me dije se në varësi të situatës nuk përjashtohet mundësia që të ketë një rishikim të masave, duke ulur fashën orare të veprimtarisë së bizneseve që mund të konsiderohen si të rrezikshme për përhapjen e infeksionit. Kjo do të thotë se mund të shkohet drejt një fashe orare ku nga ora 22:00, këto biznese të lejohet të punojnë deri ne orën 18:00.
Gjithsesi për çdo vendim, pritet që Komiteti të mblidhet gjatë javës dhe të paraqesë masat e reja.
