Atalanta-Inter u mbyll në barazim 1-1. Të dy ekipet gjetën rrugën e rrjetës në pjesën e dytë.
Lautaro Martinez kaloi ekipin e Antonio Contes në avantazh në minutën e 56-të. Kros i Ashley Young nga krahu i majtë dhe goditje e bukur me kokë e sulmuesit argjentinas, i cili gjeti golin e katërt në kampionat.
Vendasit nuk u pajtuan me këtë rezultat dhe u hodhën në kërkim të golit të barazimit. Ai erdhi 11 minuta përpara fundit të ndeshjes.
Asist i Luis Muriel dhe gol i Aleksey Miranchuk. Rusi lëvizi bukur mes mbrojtjes zikaltër dhe mposhti Handanovic falë një goditje të saktë me të majtën.
Kështu Interi nuk arrin të përfitojë nga barazimi 1-1 mes Lazios dhe Juventusit më herët gjatë ditës. Aktualisht zikaltërit renditen në vendin e 6-të me 12-të pikë.
Në ndeshjen tjetër të Serie A, Roma fitoi 1-3 ndaj Genoas. Heroi i takimit ishte Henrikh Mkhitaryan, me armenin që realizoi një trigolësh.
