Joe Biden kalon në epërsi dhe në shtetin e Pensilvanisë.
Sipas përditësimit të fundit të dhënave nga televizioni amerikan “Fox News”, kandidati demokrat në zgjedhjet presidenciale në SHBA, kryeson me 0.1 përqind të votave ndaj Presidentit Donald Trump, teksa janë numëruar 99 përqind të votave.
Më konkretisht, Biden po udhëheq me 3 295 319 vota, kundrejt 3 289 725 votave të kandidatit republikan. Diferenca në shtetin me 20 mandate elektorale është 5 594 vota.
Tanimë, për sa i përket shteteve të diskutueshme, Biden po udhëheq në Pensilvani, Xhorxhia dhe Nevada.
Kandidatit demokrat i mjafton vetëm fitorja në një nga këto shtete për të fituar zgjedhjet Presidenciale dhe për të marrë drejtimin e Shtëpisë së Bardhë për 4 vite.
Nga ana tjetër, Presidentit Trump i duhet të kthejë rezultatin në këto tre shtete dhe të mbajë kryesimin në Alaskë dhe Karolinën e Veriut për tu rizgjedhur President i SHBA-ve.
/BN/
