Këngëtarja e famshme Ariana Grande ka “shpërthyer” kundër VIP-ave që organizojnë festa gjatë kohës së pandemisë.
Këngëtarja shprehu shqetësimin e saj gjatë emisionit “Zach Sang Show”, që transmetohet në “YouTube”, raporton “Mirror”. 27-vjeçarja tha se të gjithë të famshmit duhet të qëndrojnë në shtëpi për të luftuar pandeminë si shumë vende të tjera.
“A kemi patjetër të gjithë nevojë të shkojmë tek ‘Saddle Ranch’ aq sa s’mund të presim që të kalojë kjo pandemi vdekjeprurëse?!”- shtë shprehur Grande e revoltuar.
“Saddle Ranch” është një vend luksoz për personazhet e njohur që ndodhet në Kaliforni. Ai njihet edhe për demin mekanik, tek i cili shumë të famshëm kanë realizuar video që i kanë postuar në rrjete sociale.
“Kemi vërtetë kaq shumë nevojë të veshim çizme kauboj dhe të hipim mbi një dem mekanik?! Të gjithë kemi kaq shumë nevojë për atë dreq postimi në Instagram?!”,- ka vazhduar më tej këngëtarja, duke shprehur publikisht zemërimin e saj.
Ariana u shfaq në emision për të promovuar edhe albumin e saj të ri, “Positions”, që u publikua ditën e premte. Ky është albumi i tretë i këngëtares, pas ‘Sweetner” që u lançua në 2018-tën dhe´”Thanku U Next” të vitit 2019-të.
