Kryeparlamentarja Vjosa Osmani do të marrë edhe drejtimin e presidencës pas dorëheqjes së Hashim Thaçit.
Kushtetuta e Kosovës parashikon që në rast dorëheqje të presidentit, drejtimin e Presidencës e merr kryetari i Kuvendit.
Njohësi i Kushtetutës, Kushtrim Palushi, sqaroi se as nuk mund të ketë kundërshti nga partitë politike, duke qenë se Kushtetuta e ka një dispozitë të tillë. Por, ai tha se nëse për gjashtë muaj nuk arrihet të zgjidhet një president i ri, vendi duhet të shkojë në zgjedhje.
“Bazuar në Kushtetutën e Kosovës në rast të mungesës së presidentit, qoftë edhe në rast të mungesës së përkohshme, e zëvendëson kryetarja e Kuvendit, në këtë rast Vjosa Osmani. Por, menjëherë duhet të fillohet me procesin e zgjedhjes së presidentit të ri. Nëse s’kemi 6 muaj president atëherë shpallen zgjedhje të jashtëzakonshme. Kjo procedurë është automatike që e parasheh Kushtetua dhe kjo nuk pyet partitë politike, por është dispozitë kushtetuese”, sqaroi ai për mediat në Kosovë.
Hashim Thaçi njoftoi këtë të Enjte dorëheqjen nga posti i Presidentit të Kosovës, pasi Gjykata Speciale konfirmoi akt-akuzat ndaj tij.
