Presidenti Ilir Meta i ka drejtuar një thirrje Kryeministrit Edi Rama që të dialogojë me naftëtarët për gjetjen e një zgjidhjeje të pranueshme, duke shmangur një përshkallëzim të situatës.
“Është tepër e domosdoshme dhe bëj thirrje për vendosjen e menjëhershme të dialogut mes Qeverisë dhe grave greviste e naftëtarëve për një zgjidhje sa më të pranueshme të kërkesave të drejta të tyre, për të shmangur përshkallëzimin e situatës me pasoja për shëndetin e grevistëve”, shprehet Meta.
Në vijim ai thekson se është shumë e rëndësishme të bëhet çdo përpjekje, pa vonesa të metejshme, për një trajtim të përgjegjshëm shtetëror dhe njerëzor të kësaj çështje, me qëllim zgjidhjen e kësaj situate të rëndë sociale dhe humanitare përpara se të përballemi me probleme shëndetësore që mund të rrezikojnë jetën e të ngujuarve.
Gratë naftëtare kanë hyrë në ditën e 21 të grevës së urisë, ndërsa kërkojnë pagat e prapambetura, që i kanë fituar me vendime gjykate. Kryeministri Rama i ka kërkuar që të ndërpresin grevën dhe më pasi ai është i gatshëm të dialogojë. Kërkesa e Ramës nuk është pranuar prej grevistëve të urisë.
