Nga Boldnews.al
Në kulmin e pandemisë së koronavirusit, OBSH ka sugjeruar që popullata më e riskuar, si të moshuarit dhe personeli mjekësor, duhet të vaksinohen nga gripi stinor. Kjo konsiderohet një formë e mirë që në mënyrë indirekte të luftohet edhe koronavirusi, pasi bashkimi i saj me gripin stinor mund të komplikojë edhe më shumë gjendjen e pacientëve të prekur me COVID-19.
Instituti i Shëndetit Publik (ISHP), ka prokuruar një sasi të konsiderueshme vaksine kundër gripit sezonal, por të një cilësie mjaft të dobët. Burime të Boldnews.al mësojnë se vaksina ka “tre valent”, ndërsa duhet të kishte “katër valent” që të konsiderohet e efektive. Gjithashtu një tjetër skandal është se vaksina është tërhequr para kohe, (rreth dy javë më parë) dhe i përket gjendjeve stok të prodhuara vitin e kaluar.
Nga ana tjetër, edhe prodhimi është i kompanive koreane, të cilat nuk shqyhen për cilësi dhe zakonisht kjo vaksinë tregtohet në vendet e botës së tretë. Tashmë ajo ndodhet nëpër farmacitë e spitaleve dhe në poliklinikat e vendit. Të parëve që u është kërkuar që ta bëjnë vaksinën ka qenë personeli mjekësor, por nga ana e tyre ka pasur një refuzim të konsiderueshëm, pikërisht duke u nisur nga cilësia. Ndonëse nuk është arritur deri në “kërcënime” drejtues të institucioneve shëndetësore u kanë kërkuar që ta bëjnë vaksinën, jo më shumë për arsyen e “mbrojtjes së shëndetit”, por që të plotësohet plani… sepse duhet justifikuar edhe prokurimi.
Një pjesë e mirë e personelit shëndetësor, por edhe të moshuar e kanë refuzuar këtë vaksinë, pasi sipas tyre nuk jep efektin e kërkuar për dy arsye, së pari është jo cilësore dhe e dyta kryerja e vaksinimit në muajin tetor nuk rekomandohet, por në nëntor e më pas sipas direktivave epidemiologjike dhe studimeve po sezonin gripal.
Në farmacitë e vendit, vaksina e gripit e trumbetuar nga qeveria si një “nismë e duhur” gjendet aktualisht për vetëm 10 mijë lekë të vjetra dhe ajo nga mjekët nuk rekomandohet si efikase. Në këtë mënyrë e gjithë sasia e prokuruar do të shërbejë vetëm si statistikë, por nuk do ketë efektin e duhur.
E gjitha kjo lojë nuk duhet të kishte ndodhur, sidomos në këtë periudhë ku të infektuarit me COVID-19 po shtohen frikshëm në vendin tonë dhe më e pakëta që mund të bëhej ishte pikërisht tërheqja e vaksinave cilësore kundër gripit sezonal.
