Kreu demokrat, Lulzim Basha, gjatë një takimi me studentë të mjekësisë, tha se problemi i pandemisë është mungesa e testimeve. Basha tha se valën e dytë të infeksionit nuk e ndalte dot askush, por duhej të ishin marrë masa.
“Kemi testimet më të ulëta në Europë, sepse shpenzimet më të mëdha i kemi për inceneratorët, për mafien e plehrave. Duhet të mbrojmë njerëzit më të riskuar nga kjo pandemi, prindërit tanë.
Unë kam 1 muaj që nuk i takoj prindërit, im atë kishte ditëlindjen para dy ditësh, por duhet t’i mbrojmë, pasi kjo moshë është me riskun më të lartë dhe ne duhet t’i mbrojmë ato”, tha Basha.
Sipas kreut demokrat, Inbox-i im plot me mesazhe që kanë deri në dhjetë ditë që presin të testohen dhe injorohen.
“Të sëmurëve në shtëpi u jepen receta që kushtojnë qindra mijëra lekë. Studentët nuk u njoftuan në kohë për kalimin e mësimit online, asnjë masë nga qeveria për këtë kalim të beftë. Studentët kanë paguar qiratë e shtëpive, kanë lënë punën në qytetet e tyre për të ardhur në shkollë”, tha Basha.
Ai shtoi se ka një papërgjegjshmëri të Qeverisë lidhur me situatën.
Kreu demokrat tha se këtë abuzim që kanë bërë me paratë e shqiptarëve në këto muaj të pandemisë, kanë 7 vite me rradhë që e bëjnë, duke shtuar se vendi ka nevojë për një qeveri transparente dhe të përgjegjshme.
“Nuk jemi një vend i varfër, por jemi një vend i vjedhur. Sot studentët e mjekësisë që po bëjnë stazhin edhe në spitalet Covid, duke dhënë ndihmesën e tyre, nuk po paguhen”, tha Basha.
Ai u shpreh se ka 5 javë që bëj thirrje për subvencionimin e tabletëve për mësimin në distancë.
“Kjo pandemi vetë sa i hoqi maskën kësaj qeverie. Rrugëdalja është të kthehen taksat tek qytetarët, jo tek inceneratorët”, tha Basha. Sipas tij, njerëzit po marrin kredi për të paguar për ilaçet kundër pandemisë.
“Kemi arritur deri në pikën që pacientët po marrin kredi për të mbuluar shpenzimet e medikamenteve”, tha Basha.
