Pas tërmetit vdekjeprurës dhe situatës së rëndë në Turqi, ekipet e shpëtimit vazhdojnë kërkimin për njerëz të mbetur nën rrënoja.
Sot ata kanë mundur të nxjerrin nga rrënojat e një ndërtese të shembur dy vajza të cilat janë drejtuar menjëherë drejt shërbimit spitalor.
Vajzat me moshë 3 dhe 14 vjeçare kishin qëndruar aty për gati tri ditë. Më e vogla, tre vjeç, arriti të shpëtonte pavarësisht lëndimeve, duke u bërë personi i 106 i shpëtuar, ndërsa motra e saj 14 vjeçare nuk mundi të përballonte plagët dhe humbi jetën.
Numri i viktimave nga tërmeti i ditës së premte ka shkuar në 87, pasi ekipet kërkimore kanë gjetur shumë trupa mes ndërtesa të shembura në Izmir, qyteti i tretë më i madh i Turqisë dhe më i prekuri nga fatkeqësia natyrore.
Zyrtarët kanë deklaruar se 220 të mbijetuar nga tërmeti janë ende të shtruar në spital dhe katër prej tyre ishin në gjendje të rëndë.
Tërmeti gjithashtu shkaktoi një tsunami të vogël që goditi Samos dhe rrethin Seferihisar të Izmirit, nga përmbytja e të cilit humbi jetën një grua. Lëkundjet janë ndjerë në të gjithë Turqinë perëndimore, duke përfshirë Stambollin si dhe në kryeqytetin grek të Athinës.
Turqia ka një ndërthurje të ndërtesave të vjetra dhe ndërtimeve të lira ose të paligjshme, të cilat mund të çojnë në dëme serioze dhe vdekje kur goditen tërmetet.
Rinovimi urban është duke u zhvilluar në qytetet turke, por kjo nuk po ndodh mjaft shpejt. Shteti turk është zonë sizmike dhe njihet për tërmetet e forta. Në vitin 1999, dy tërmete të fuqishme vranë rreth 18,000 njerëz në Turqinë veriperëndimore.
