Ashtu siç e patën paralajmëruar një dtë më parë, Lëvizja për Universitetin, zhvilloi ditën e sotme një ptotestë simbolike para kryeminsitrisë.
Ata kërkaun edhe njëherë nga kryeminsitri dhe qeveria përgjysmimin e tarifave studentore si dhe një paketë sociale për qiratë, internetin, librat dhe kostot e jetesës.
Lëvizja për Universitetin paralajmëron përshkallëzim të protestave në rast të mosplotësimit të kushteve.
Ja njoftimi i Lëvizjes për Universitetin:
KOMUNIKATË PËR SHTYP
Që prej karantinës së muajit mars studentët kanë qenë një nga shtresat më të dëmtuara të shoqërisë. Po qeveria nuk ka menduar asnjë çast për ta. Mijëra studentë e patën të pamundur ta ndiqnin normalisht procesin mësimor online si pasojë e mungesës së mjeteve teknike dhe aksesit në internet. Mijëra të tjerë mbetën të papunë. Shumë mbetën të pastrehë në pamundësi për të punuar dhe paguar qiratë.
Nëntë muaj më vonë, e njëjta situatë rrezikon të përsëritet. Mësimi online vazhdon të jetë i pamundur për shumicën e studentëve, qiratë janë rritur, kostot e jetesës po ashtu, karta studentore nuk funksionon, abone nuk ka, shërbime sociale e shkollore jo e jo. Ndërkohë qeveria në vend që të lehtësojë barrën e studentëve, i mban të larta tarifat e studimit dhe jep urdhër që konviktet të boshatisen nga studentët.
Prandaj ne kemi ardhur këtu, përpara kryeministrisë, për të kërkuar:
- Përgjysmim të tarifës vjetore të studimit, dhe
- Një paketë sociale për qiratë, internetin, librat dhe kostot e jetesës.
Në të kundërt, në kushtet e keqshkollimit dhe papunësisë, mungesës së strehimit dhe parave, do të vijmë me mijëra studentë të tjerë, bashkë me valixhe, rroba, këpucë, libra dhe tenxhere në kryeministri.
Nëse kryeministria vazhdon të mbetet shtëpi e oligarkëve në kohë krize, ne do ta kthejmë në vatër të studentëve, punëtorëve, pensionistëve dhe qytetarëve të prekur nga pandemia.
Kupa është mbushur dhe nuk mban më.
#PërUniversitetin
