Preng Gjonaj, 52 vjeç, i dha fund jetës sot duke u vetëhedhur nga kati i katërt i spitalit “Shefqet Ndroqi”, i kthyer prej muajsh në spital Covid. Dyshimet e para janë se viktima e ka ndërmarrë aktin si pasojë e gjendjes së rënduar psikologjike.
Nga të dhënat spitalore, mësohet se 52-vjeçari nga Tropoja, kishte rreth 1 javë që ishte shtruar në këtë spital ku po trajtohej për koronavirus. Ai ndodhej në katin e katërt të spitalit, ku trajtohen pacientët që kanë një gjendje të rënduar.
Policia njoftoi mëngjesin e sotëm se ngjarja e rëndë ka ndodhur rreth orës 03:10 të datës 1 nëntor, ndërsa kanë nisur hetimet lidhur me të. Gjonaj është pacienti i 3-të në 3 muajt e fundit që i jep fund jetës duke u vetëhedhur nga lartësia në spitalin Shefqet Ndroqi. Policia, mësohet se në kuadrin e hetimeve që po kryhen, ka sekuestruar kartelën mjekësore të pacientit.
Policia u njoftua për ngjarjen nga personeli mjekësor i spitalit. Lidhur me vetëvrasjet e mëparshme në këtë spital, Prokuroria e Tiranës në muajin shtator nisi hetimet, ndërsa mori në pyetje disa nga mjekët dhe personelin mjekësor.
