Ish-deputetja demokrate, Albana Vokshi, e ka cilësuar antikushtetues vendimin e qeverisë për mos hapjen e Universiteteve dhe urdhërin për të zhvilluar mësim online.
Vokshi ka publikuar ligjin për Arsimin e Lartë, i cili nuk e njeh mësimin online.
Me anë të një statusi në Facebook, Vokshi thekson se qeveria po i diskriminon studentët dhe po ju izolon të ardhmen.
Ja postimi i plotë i Vokshit:
UNIVERSITETET ONLINE NË SHKELJE TË LIGJIT
Një shkresë me firmën e një drejtori në Ministrinë e Arsimit ka vendosur për të ardhmen e studentëve dhe universitet online në shkelje të çdo ligji.
Ligji i Arsimit të Lartë, në nenin 59 përcakton:
Format e studimeve në institucionet e arsimit të lartë janë:
- a) Studime me kohë të plotë
- b) Studime me kohë të zgjatur
Pra, Ligji nuk I njeh studimet në distancë (online).
Studentët kanë qenë më të diskriminuarit gjatë periudhës së pandemisë. Pjesa më e madhe e tyre nuk patën asnjë mundësi të ndiqnin studimet online, nuk patën asnjë mbështetje për punësim, asnjë paketë ndihme.
Sa antihumane duhet të jetë një qeveri që vetëm 3 ditë para fillimit të vitit akademik t’i mbyllë universitetet? Sa është kosto për çdo familje studenti? Sa studentë nuk do mund të ndjekin dot studimet pasi nuk kanë asnjë mundësi në shtëpitë e tyre??
Është më keq se në diktaturë.
Por historia ka treguar që diktaturave fundi u vjen nga të rinjtë.
