Partia Demokratike akuzon qeverinë se ka dështuar në misionin e saj kryesor, atë të parandalimit të përhapjes së koronavirusit. Përmes një video të publikuar me copëza të deklaratave të kryeministrit Edi Rama dhe thirrjes së vazhdueshme të shefit të OBSH, Tedros Adhanamos për të kryer testime, ish-deputetja Albana Vokshi sjell në vëmendje situatën në të cilën ndodhet vendi.
Sipas saj Shqipëria është e fundit në Evropë për numrin e testimeve, ndërkohë i kujton shefit të qeverisë se dështimi nuk mund të mbulohet me sulme banale politike ndaj opozitës.
Deklarata
Dështimi i Edi Ramës me pandeminë nuk mund të mbulohet me sulme banale politike ndaj opozitës.
Partia Demokratike është bërë zëri i qytetarëve, që nuk gjejnë asnjë mbështetje nga qeveria. Kemi që në mars që i kërkojmë Edi Ramës të rrisë testimet.
Përgjigja e tij është sulmi politik në vend të blerjes së tamponëve.
Kjo politikë skandaloze e Edi Ramës është arsyeja kryesore pse Shqipëria është e fundit në Europë për testimet, pse numri i vdekjeve është rritur, pse situata ka dalë jashtë kontrollit dhe pse rrezikojmë të mbyllemi sërish.
