Tenderi “sekret” i ushqimeve/ SPAK “harron” hetimet, Xhaçka paguan milionat

Nga BoldNews.al

Një hetim penal, që siç u tha publikisht nga SPAK, ka nisur për një tender sekret ushqimesh të zhvilluar nga Ministria e Mbrojtjes në Mars 2020, duket se nuk ka dhënë asnjë efekt.

Kompania fituese, “Eurovia” shpknj ka marrë të gjithë shumën e prokururuar, rreth 1.2 milionë euro, ndërkohë që nga Prokuroria e Posaçme nuk duket se ka pasur asnjë veprim konkret.

Në portalin informativ “spendingdata.al” rezulton se Reparti Ushtarak nr.4300 Tiranë, struktura përfituese e furnizimit me ushqime, ka kryer tre transferta kundrejt kompanisë private, për një total prej 121 milionë lekë të reja pa TVSH.

Këto pagesa janë kryer në të njëjtën ditë, në 15 Maj 2020, në një kohë që prokuroria SPAK kishte deklaruar se kishte nisur hetimet, nën dyshime për shkelje të barazisë në tendera.

Në 30 Mars 2020, “Boldnews.al” publikoi shkrimin me titull: “Tender 1.5 mln euro për ushqimet/ Xhaçka ia jep një kompanie kompjuterash pa garë”.

Në bazë të të dhënave zyrtare, Ministria e Mbrojtjes, e drejtuar nga Olta Xhaçka, zhvilloi një tender “sekret”, me formulën e “negocimit, pa shpallje paraprake” për furnizimin me ushqime, në kuadër të masave përballuese për “Covid 19”.

LEXO EDHE  A duhet të vaksinohen personat që e kanë kaluar koronavirusin? Ja çfarë thotë Alimehmeti

Në përfundim të një procedure emergjente, Ministria e Mbrojtjes shpalli fituese kompaninë “Eurovia” shpknj, një degë në Shqipëri e një shoqërie nga Maqedonia e Veriut.

Të dhënat publike, të konsultuara nga “Boldnews.al”, dëshmuan se “Eurovia” shpknj ishte regjistruar në Shqipëri vetëm 6 ditë para shpalljes së tenderit sekret.

Gjithashtu, sipas të dhënave të Qendrës Kombëtare të Regjistrimit (QKR), kompania fituese e tenderit për ushqime, në atë kohë, kishte aktivitet në fushën e pajisjeve elektronike.

Pas këtij publikimi, Partia Demokratike në opozitë dorëzoi një kallëzim penal në Prokurorinë Speciale-SPAK, nën dyshimet se ministrja Olta Xhaçka dhe zyrtarë të tjerë të lartë të Ministrisë së Mbrojtjes kanë kryer veprën penale të shkeljes së barazisë në tendera dhe shpërdorim detyre.

Në 9 Prill 2020, prokuroria Speciale SPAK konfirmoi se ka nisur hetimet për tenderin sekret të Ministrisë së Mbrojtjes.

Por, nisja e hetimit nuk e ka penguar Ministrinë e Mbrojtjes të kryejë pagesat, ndoshta nxitur edhe nga mefshtësia e prokurorëve të SPAK-ut për të kryer veprime hetimore.